कल्याण-डोंबिवलीतील विद्यार्थ्यांचा सम्यक विद्यार्थी आंदोलनात जाहीर प्रवेश
ठाणे : वंचित बहुजन आघाडीचे राष्ट्रीय अध्यक्ष ॲड. बाळासाहेब आंबेडकर तसेच सम्यक विद्यार्थी आंदोलन सल्लागार समितीचे सदस्य महेश भारतीय सर यांच्या विचारांवर आणि नेतृत्वावर विश्वास व्यक्त करत कल्याण-डोंबिवली महानगर जिल्ह्यातील विद्यार्थी व विद्यार्थिनींनी सम्यक विद्यार्थी आंदोलन, ठाणे जिल्हा या वंचित बहुजन आघाडीच्या विद्यार्थी आघाडीत जाहीर प्रवेश केला.
विद्यार्थ्यांच्या शिक्षणाचा अधिकार, समान संधी, सामाजिक न्याय तसेच विविध शैक्षणिक प्रश्नांसाठी संघटितपणे लढा उभारण्याच्या निर्धारातून हा प्रवेश करण्यात आला. विद्यार्थ्यांच्या प्रश्नांना प्रभावीपणे वाचा फोडण्यासाठी आणि शैक्षणिक क्षेत्रातील अन्यायाविरोधात व्यापक विद्यार्थी चळवळ उभी करण्याचा निर्धार यावेळी व्यक्त करण्यात आला.
या निमित्ताने आयोजित बैठकीस सम्यक विद्यार्थी आंदोलनाचे महाराष्ट्र राज्य प्रवक्ते रुपेश हूंबरे सर, ठाणे जिल्हाध्यक्ष अनिकेत मोरे, ठाणे जिल्हा महासचिव राजू खरात तसेच कल्याण-डोंबिवली उपाध्यक्ष नितीन कांबळे यांची प्रमुख उपस्थिती होती.
यावेळी उपस्थित विद्यार्थ्यांनी शिक्षण व्यवस्था, विद्यार्थ्यांच्या हक्कांचे प्रश्न आणि सामाजिक न्यायाच्या मुद्द्यांवर संघटितपणे काम करण्याचा निर्धार व्यक्त केला. कल्याण-डोंबिवली परिसरात सम्यक विद्यार्थी आंदोलन अधिक मजबूत करण्यासाठी आगामी काळात विद्यार्थी संपर्क आणि संघटनात्मक उपक्रम वाढविण्याचा निर्धारही करण्यात आला.
